Бүгүн Таатта улууһун киинигэр Ытык Күөлгэ «Доруобуйа харыстабыла» национальнай программа чэрчитинэн саҥа Поликлиника дьиэтэ аһылынна. Бу улахан суолталаах тэрээһиҥҥэ Саха Өрөспүүбүлүкэтин Ил Дархана Айсен Сергеевич Николаев ыалдьыттаата. Онтон Былатыан Ойуунускай аатынан норуот тыйаатырыгар биллэр суруналыыс Олег Марковтыын кэпсэтиигэ уһулунна.

Салгыы Таатта улууһун баһылыга Айаал Семенович Бурцевтыын Саха Өрөспүүбүлүкэтин ойууга-дьүһүҥҥэ бас түмэлин Тааттатааҕы филиалыгар ыалдьыттаата. Айсен Сергеевич хартыына галереятын тэриллиитин устуоруйатын, саха биллэр худуоһунньуктарын Афанасий Осипов, Афанасий Собакин, Виктор Петров, Эдуард Васильев, Николай Павлов уонна Тааттаттан тардыылаах Мария Рахлеева, Гавриил Петров, Вячеслав Яроев уонна эдэр худуоһунньук Семен Нучеканов үлэлэрин кытта билистэ. Галерея үлэтин инники былаанын ыйыталаста. Галерея салайааччыта Вера Канаева, эһиил 2024 сылга, тыа сиригэр бастакы хартыына галереята төрүттэммитэ 50 сылыгар, Саха АССР искусствотын үтүөлээх деятелэ, живописец Иннокентий Корякин аатын иҥэрэргэ, тэрилтэ аатын Тааттатааҕы диэҥҥэ көһөрөргө уонна норуот материальнай баайын харайарга сөптөөх объект тутуллара наадалааҕын эттэ.

Наталья Григорьева, Марианна Степанова хаартыскаҕа түһэриилэрэ